Елчӗк районӗнче вырӑнти район хаҫат парнисемшӗн кире пуканӗ йӑтакансен XVI турнирӗ иртмелле. Унта пӑхаттирсем паян, юпа уйӑхӗн 30-мӗшӗнче, Елчӗкри Спорт ҫуртне пухӑнӗҫ.
Атлетсем икӗ енлӗ, кире пуканне 10 минутра нумайрах йӑтас енӗпе ӑмӑртӗҫ.
Турнира хутшӑнакансен виҫине 8 сехетрен палӑртма пуҫланӑ ӗнтӗ. 9 сехет те 30 минутра 2004 ҫулта ҫуралнӑ тата ҫамрӑкрах арҫын ачасемпе хӗрачасем помост ҫине тухӗҫ. Вӗсем 6 килограмлӑ кире пуканне йӑтӗҫ.
Ӑмӑрту 11 сехетре пуҫланӗ. Ун хыҫҫӑн 1998 ҫулта ҫуралнӑ тата ҫамрӑкрах хӗрачасемпе хӗрсем, арҫын ачасемпе яшсем хӑйсен ӑсталӑхӗпе кӑтартӗҫ.
Командӑсен тупӑшӑвне Чӑваш Республикинчи тата районти шкулсем хушшинче пӗтӗмлетӗҫ.
Хӑйсен виҫисенче ҫӗнтернӗ атлетсене «Елчӗк ен» хаҫата 2016 ҫулхи пӗрремӗш ҫур ҫулшӑн тӳлевсӗр ҫырӑнса парӗҫ. Ҫавӑн пекех ҫӗнтерӳҫӗсемпе призерсене грамотӑсемпе чыслӗҫ.
Чӑваш Ен спортсменӗсем, Раҫҫейӗн пӗрлештернӗ командине кӗнӗскерсем, кире пуканӗ йӑтассипе иртнӗ тӗнче ӑмӑртӑвӗнче пухмача ылтӑн медальсемпе пуянлатнӑ.
Ӑмӑртӑва 34 ҫӗршыври 500 ытла спортсмен хутшӑннӑ. Вӗсен йышӗнче — Чӑваш Ен спортсменӗсем те. Вӗсем — Чӑваш патшалӑх ял хуҫалӑх академийӗн студенчӗ Александр Павлов, Йӗпреҫ район хӗрӗ, халӗ Питӗрте вӗренекен Марина Фёдорова.
Александр Павлов 22 ҫул тултарманнисен йышӗнче 1-мӗш вырӑн йышӑннӑ. Марина Федорова та малти вырӑна йышӑннӑ. Кире пуканӗн ветеранӗсем те медальсем ҫӗнсе илнӗ. Владимир Шуряков — 1-мӗш вырӑн, Юрий Карпов -2-мӗш вырӑн, Валерий Притуленко 3-мӗш вырӑн йышӑннӑ.
Хӗрлӗ Чутай районӗнче Хӗллехи Олимп вӑййисене тата Ҫӗршыв хӳтӗллевҫисен кунне халалласа спорт ӑмӑртӑвӗсем иртрӗҫ. Ӑмӑртусенче предприятисемпе организацисем, ял тӑрӑхӗсен командисем, спорта юратакансем хутшӑнчӗҫ. Вӗсем пневматика пӑшалӗпе тӗл перессипе, тенниспа, дартс, кире пуканӗ йӑтассипе, ишессипе, шашкӑпа тата шахматпа выляссипе вӑй виҫрӗҫ, юлашкинчен волейбол вӑййи вылярӗҫ. Ӑмӑртусем командӑсем тата уйрӑм спортсменсем хушшинче иртрӗҫ.
Ҫӗнтерӳҫӗсем кашни вӑйӑрах нумайӑн, хӑшӗ-пӗрисене асӑнса хӑварар.
Ишессипе Ю.Пирогова (район пульници), А.Кучекеева (Питӗркасси ял тӑрӑхӗ), Н.Шипеева (Штанаш ял тӑрӑхӗ) малта пулчӗҫ. Арҫынсем хушшинче В.Михуткин (Питӗркасси ял тӑрӑхӗ), И.Сатлайкин (Штанаш ял тӑрӑхӗ) тата А.Сидоров(Хӗрлӗ Чутай райповӗ) ҫӗнтерчӗҫ.
Ушкӑнсем хушшинче малти вырӑнта Питӗркасси ял тӑрӑхӗ пулчӗ, унтан Хӗрлӗ Чутай ял администраци спортсменӗсем вырнаҫрӗҫ. Пульница коллективӗн спортсменӗсем — 3 вырӑнта.
Дартс вӑййи выляссипе командӑсене илес пулсан, малтисем — район администраци чысне хӳтӗлекенсем, 2-мӗшсем — «Хастар» спорткомплекс ӗҫченӗсем, 3-мӗшсем — Хӗрлӗ Чутай ял тӑрӑхӗн спортсменӗсем.
+8.3 °C